O escaparate

Trece anos de Branca

2009-05-03T23:01:00.010+02:00

Autor: Agustín Fernández Paz

Ilustrador: Manuel Uhía

Esta entrañable e sincera recompilación de lembranzas permítenos ir coñecendo como é e como foi a vida de Branca, unha rapaza de trece anos. A súa infancia, a súa forma de vivir, os problemas dos seus pais, a escola, o primeiro amor... son escenas que se van debullando grazas ao efecto evocador dunhas fotografías que vai colocando no álbum que lle regalaron polo seu aniversario.

Obra gañadora do Premio Edebé de Literatura Xuvenil 1994.

Cuentos completos

2009-05-03T22:58:00.005+02:00

Autor: Oscar Wilde

Nesta obra preséntase toda a narrativa breve de Wilde, dende os seus primeiros contos como El Príncipe Feliz ou El ruiseñor y la rosa, que aparecen como lendas con sabor tradicional e nos que a estética xoga un papel social, ata o famoso El fantasma de Canterville, onde xorde a vea satírica e humorística do autor.

La espada y la rosa

2009-05-03T20:43:00.006+02:00

Autor: Antonio Martínez Menchén

Certa noite de inverno chega ao mosteiro en ruínas, onde viven o mozo Moisés e o irmán Martín, un peregrino enfermo e extraviado, quen realmente é un cabaleiro cruzado que viviu en Oriente extraordinarias aventuras. Unha vez curado, Moisés acompañarao na súa peregrinación a Compostela. Non chegarán a se prostrar ante Santiago, pero Moisés alcanzará nesa viaxe algo no que xamais soñou.

Unha novela de aventuras medievais na que o autor, baseándose en textos literarios da época, traza un cadro moi completo da Baixa Idade Media, coa súa poesía e a súa miseria, a súa brutalidade e a súa profunda piedade.

El llano en llamas

2009-05-03T20:24:00.005+02:00

Autor: Juan Rulfo

El llano en llamas é un dos 17 contos incluídos neste libro, publicado por primeira vez en 1953, que dá nome ao mesmo. A temática dos contos vira ao redor da vida rural na época da Revolución Mexicana e da Guerra Cristera e os conceptos que van unidos a estas: a desigualdade social, a loita pola terra, a relixión e a política, entre outros. Outra das súas características importantes é o uso da linguaxe popular e a narración, na súa maior parte, na voz dos personaxes. Os contos incluídos na colección son:

Nos han dado la tierra
La cuesta de las comadres
Es que somos muy pobres
El hambre
En la madrugada
Talpa
Macario
El llano en llamas
Diles que no me maten
Luvina
La noche que lo dejaron solo
Paso del Norte
Acuérdate
No oyes ladrar los perros
El día del derrumbe
La herencia de Matilde Arcángel
Anacleto Morones

É un pracer ler e reler estes contos. Non hai un só relato que non garde dentro del esa prosa poética, tan cargada de dores, soidade e violencia, que conmove.

Viaje al centro de la Tierra

2009-05-02T01:26:00.020+02:00

Autor: Julio Verne

O obstinado profesor Lidenbrock descifra un criptograma do alquimista Arne Saknussemm e chega á conclusión de que é posible viaxar ao centro da Terra. Polo cráter dun volcán apagado descende, xunto co seu escéptico sobriño Axel, e Hans Bjelke, un imperturbable guía. O seu esforzo e a súa coraxe son grandes como a perplexidade que senten ante abismos, mares de lava, rabaños de mastodontes ou vexetación antediluviana.

Se Julio Verne lle tivese feito caso ao seu pai e exercese como avogado, miles de lectores non poderían gozar cos seus fabulosos relatos de aventuras, viaxando en globo, mergullándose nas profundidades do océano, indo da Terra á Lúa ou penetrando no interior do noso planeta. Pero Verne tiña moi claro que el quería escribir. E esta vontade, unida aos seus grandes coñecementos científicos, á súa incrible imaxinación, á súa capacidade de premonición para ver o futuro e á súa técnica narrativa que consegue captar ao lector e introducilo no relato, fan de Julio Verne un dos autores máis lidos e populares de todas as épocas.

Vén á Biblioteca e descobre todos os títulos deste mestre da literatura universal que están á túa disposición. En particular, este que agora che propoñemos o podes atopar traducido a tres idiomas: castelán, galego e inglés.

Memorias dun neno labrego

2009-05-02T00:58:00.006+02:00

Autor: Xosé Neira Vilas

"Eu son Balbino. Un rapaz de aldea. Coma quen di, un ninguén. E ademais, pobre". Así comezan os pensamentos do neno protagonista, no territorio limitado do mundo rural galego nos anos 40.

Conta neste o seu diario as súas experiencias, dende as festas tradicionais, como o Entroido ou as da parroquia, ata a vivencia dramática do loito familiar que lle impide disfrutalas. A morte tamén está presente na trampa para raposos na que cae o seu can Pachín; alí planta logo unha cerdeira. Únense deste xeito esperanza e loito, sempre á busca dun futuro non escrito.

Neste xogo de contradicións a emigración pode ser o mellor camiño, como asegura o seu pai cando marcha para América o irmán Miguel, ou unha falsa saída, como defende o padriño.

Ás veces, certamente, a única saída rebelde contra a inxustiza é a fuxida. É o que fai cando o seu pai lle pega por enfarruscar a cara ao ricachón e mimado Manolito. A malleira dóelle máis na alma que no corpo.

Un veciño xudeu faille reflexionar sobre a hipocrisía da xente, que non busca a verdade nin a xustiza, aprendendo deste home que o que realmente importa nesta vida é ser honesto e solidario.

A escola é frustrante e non abre moitos vieiros. Primeiro, o mestre andaluz non entende a terra na que está nin o entenden a el. Logo, namórase da mestra de Betanzos, converténdose nun dos mellores alumnos. Pero ela casa e cando marcha, Balbino négase a volver ao colexio. O seu pai castígao poñéndoo a servir. Parece o seu destino.

Este libro, publicado na Arxentina en 1961, é un texto clásico da literatura infantil-xuvenil galega, con traducións a todas as grandes linguas e centos de milleiros de exemplares vendidos, incuestionable testemuña literaria dunha Galicia realmente existente.

La zapatera prodigiosa

2009-05-02T00:57:00.005+02:00

Autor: Federico García Lorca

Un maduro zapateiro casa cunha moza nova e atractiva, matrimonio que, en realidade, non comprace a ningún dos dous. Ela afánase en pregoar pola veciñanza a súa longa lista de pretendentes, mentres el, na taberna, laméntase por acceder a tal unión. Chega un momento no que o zapateiro debe tomar unha decisión...

"La zapatera es una farsa, más bien un ejemplo poético del alma humana y es ella sola la que tiene importancia en la obra. (...) El color de la obra es accesorio y no fundamental como en otra clase de teatro. Yo mismo pude poner este mito espiritual entre esquimales. La palabra y el ritmo pueden ser andaluces, pero no la sustancia... Desde luego, la zapatera no es una mujer en particular, sino todas las mujeres. (...)"

Federico García Lorca

O único que queda é o amor

2009-05-01T17:01:00.008+02:00

Autor: Agustín Fernández Paz

Ilustrador: Pablo Auladell

Son dez os relatos que compoñen este libro, galardoado, entre outros, co Premio Nacional de Literatura Infantil e Xuvenil 2008.

Os personaxes teñen como nexo común recordos de amores e desamores, sentimentos íntimos que sempre perduran, momentos máxicos e inesquecibles, pero tamén amargos; amores adolescentes, secretos, imaxinados e nunca coñecidos; ou outros que perviven, como pantasmas, máis aló das súas vidas.

Cada unha das historias incluídas vén acompañada dunha emotiva ilustración, en tons escuros, alusiva á mesma, sendo os títulos destes relatos:

Un radiante silencio
Amor de agosto
Esta estraña lucidez
Unha historia de fantasmas
Ríos da memoria
Loanza da filatelia
Unha foto na rúa
Meditación ante o álbum de fotos familiar
Despois de tantos anos
Un río de palabras

Ademais, o autor, no anexo De amores e de libros, especifica os títulos das referencias ás que fai alusión.

Lendo este libro descubrirás, xunto aos seus protagonistas, que o amor é un sentimento poderosísimo, capaz de transformarte por completo e facerche ver a vida doutro xeito.

Os biosbardos

2009-05-01T17:00:00.003+02:00

Autor: Eduardo Blanco Amor

Este libro é un conxunto de "contos para a xente", postos todos en boca de sete rapaces de diferentes idades que van contando experiencias persoais do intenso e, ás veces, dramático mundo infantil.

Estes relatos pertencen, sen dúbida, ao núcleo das mellores páxinas que nos deixou este mestre da moderna narrativa galega. Son, quizais, as máis sinceras e menos académicas de cantas escribiu. Nelas brillan con luz propia as mellores virtudes do seu autor, sen interferencias de ningún tipo.

Las aventuras de Ulises: La historia de la Odisea

2009-05-01T15:24:00.013+02:00

Autora: Rosemary Sutcliff

Ilustrador: Alan Lee

Finalizada a épica guerra de Troia, Ulises, un dos caudillos gregos máis afamados, emprende coa súa flota de naves negras o regreso ao seu estrañado reino de Ítaca. Na súa accidentada e longa travesía, o heroe percorre multitude de escenarios e enfróntase a numerosos perigos, que poñen a proba o seu tempero. Pero para vencer ao ciclope Polifemo ou superar os escollos de Escila e Caribdis, para se resistir ao canto embriagador das sirenas ou aniquilar a turba de pretendentes que fan as beiras á súa fiel esposa Penélope, o solitario heroe debe reunir unha serie de calidades excepcionais que fan del un verdadeiro modelo para a Humanidade: Ulises é intelixente, astuto, hábil, calculador, enxeñoso e gaioleiro, pero tamén é xeneroso, leal, sufrido, perseverante, destro artesán ou experto narrador. Só un home tan versátil pode sobrevivir aos terribles perigos dunha viaxe que constitúe unha simbólica aprendizaxe de vida.

Esta libro xuvenil narra todas as aventuras de Ulises durante o seu retorno a Ítaca e á chegada á súa casa. Non deixes de coñecer "La Odisea", clásico da literatura universal creado por Homero, a través desta adaptación, especialmente escrita para os adolescentes.

A miña planta de laranxa lima

2009-05-01T15:24:00.007+02:00

Autor: José Mauro de Vasconcelos

Fermosa novela de denuncia social, na que o protagonista principal é un cativiño de cinco anos, Zezé, maltratado pola súa propia familia, fillo do paro e da mestizaxe colonial (portugués e india pinagé), listo como a fame, que vive nun barrio marxinal de Río de Xaneiro cercado de lameiras.
Zezé vive nunha favela de Bangú, nun mundo de carencias ao carón da opulencia, sabe o que non ten e non renuncia ao que desexa: quere ser sabio e poeta para saír da miseria… Ten unha planta de laranxa lima coa que comparte sorrisos e bágoas e un amigo portugués para salvalo das súas incertezas. Por ser franco e bondadoso péganlle todos arreo, agás a súa naiciña que, como está cansa de traballar, non ten forzas, e zóscalle a modiño…

Este é un deses escasos libros que se venden por milleiros e que gustan a adolescentes, pequenos e grandes, xa que o autor sabe chegar ao corazón do lector sen máis artimaña que a de facer boa literatura.

Cuentos y leyendas de la Europa medieval

2009-04-30T12:00:00.003+02:00

Autor: Gilles Massardier

Ilustrador: Pablo Alonso

Contén once narracións, contos e lendas ambientadas na Europa medieval. Gilles Massardier rescata personaxes, situacións e mentalidades sepultadas no tempo. Así, aparece misteriosamente enlazado o real e o fantástico, o natural e o sobrenatural, trazos característicos do universo medieval. Cabaleiros e reis de lenda, dragóns e homes-lobo, fadas e demos, feitos marabillosos e fazañas portentosas, como expoñentes da riqueza cultural dun período da historia que alberga moitas das claves da nosa propia identidade.

A perla

2009-04-30T11:18:00.006+02:00

Autor: John Steinbeck

Baseada nunha lenda mexicana, esta novela conta a historia dunha perla, grande como un ovo de gaivota, tan fermosa e perfecta como a lúa, que un día cambia dun xeito radical a vida de Kino e da súa familia. Dende entón, o propio Kino, a súa muller Juana e Coyotito, o fillo de ambos, vanse ver afectados pola posesión desta perla.

Esta pequena obra mestra, considerada hoxe en día como unha xoia da literatura universal do século XX, está contada como unha fermosa historia na que se exemplifica, ao xeito dos mitos ou traxedias clásicas, a imposibilidade de vencer o "fatum" ou destino adverso, que é máis poderoso que calquera intento titánico do home por vencelo. O relato da desventura dun humilde pescador e da súa familia por culpa da perla máis fermosa do mundo contén unha amarga crítica da cobiza e da rapacidade, sentimentos que levan á destrución.

Don Juan Tenorio

2009-04-30T11:16:00.005+02:00

Autor: José Zorrilla

Edición: Ana Alcolea

Don Juan é un dos personaxes literarios máis xenuínos que España achegou ao universo das letras. Aínda que Zorrilla non inventou a Don Juan, elevouno á categoría de mito que hoxe ten. A súa obra recolleu toda a tradición "donxoanesca" e aderezouna con elementos relixiosos e románticos. O autor conseguiu facer dos seus personaxes un arquetipo humano, cuxas características dificilmente poden ser imitadas sen caer no plaxio. Don Juan, libertino, mullereiro e xogador, convértese en referencia dun modelo de home enfrontado á morte a ao amor, á castidade e á paixón. Todo iso, a través duns versos habilmente trazados, que están na memoria de todos. Porque, quen non coñece estas inmortais palabras?:

¡Ah! ¿No es cierto, ángel de amor,

que en esta apartada orilla

más pura la luna brilla

y se respira mejor?

O Pazo baleiro

2009-04-30T11:15:00.007+02:00

Autor: Xabier P. Docampo

Ilustrador: Xosé Cobas

Nicolás non é quen de seguir o ritmo das clases. Amólalle ir sempre á escola. Así que toma a seria decisión de non volver, procurando que seus pais non se decaten. Sen embargo, está engaiolado polo traballo do seu tío Delio, un reparador de vellos reloxos que vive nun vagón de tren abandonado. Nun dese reloxos está o comezo dunha emocionante investigación da man dos seus amigos Ramiro e Sol, únicos cómplices dos seus segredos, cando atopan dentro dese reloxo un cofre con misteriosos obxectos. Entre eles hai unha carta que lles dá a clave para saber ónde comezar a súa investigación: o pazo baleiro.

Do mesmo xeito cos protagonistas, cando leas este libro vivirás unha historia de aventuras e de misterio, pero tamén comprenderás o verdadeiro significado de certos valores que axudan a madurar ás persoas, tales como a solidariedade, a lealdade, a procura da verdade ou a comprensión e o respecto cara aos demais, aínda que a súa forma de vivir non se adapte ao que nós consideramos como "normal".

¡Adiós, "Cordera"!, y lo demás son cuentos

2009-04-30T11:14:00.003+02:00

Autor: Leopoldo Alas "Clarín"

Ilustrador: Francisco Conesa

Este libro está composto por trece contos escritos por un dos máis grandes literatos españois do século XIX: Clarín. Dende a denuncia contra a civilización destrutora, o capitalismo e a guerra, que aparece en ¡Adiós, "Cordera"! -ese fermosísimo conto cheo de lirismo e tenrura-, ata a caricatura grotesca de Avecilla, debuxado con piedade, emoción e crueldade ao mesmo tempo, unha riquísima galería de personaxes e situacións percorre estas páxinas, movéndose entre a humanidade e a intencionalidade crítica. Pola súa perfección literaria, a súa densidade humana e a súa inspiración, os contos deste libro poden figurar entre os máis notables da nosa literatura.

Fas e Nefas

2009-04-30T00:13:00.008+02:00

Autor: Eduardo Blanco Amor
Ilustrador: Xan López Domínguez

Este libro é unha reedición de catro textos da etapa arxentina de Blanco Amor publicados no seu momento no volume Teatro pra a xente.

Fas e Nefas ou Fantasía escolar pra nenos dun colexio luxoso... desenvolve nun castelo medieval a aventura dun rescate no que o heroe, Fas, é un rapaciño servo. Enfróntase ás forzas do mal axudado polo Pantasmo, que resulta ser Galahaz, porque alí ninguén é o que parece, nin sequera as curuxas, faisáns enfeitizados que non queren ser desenmeigadas para non ir á pota.

As outras pezas son:

A medosa Blandina: é un diálogo entre un mozo e unha moza de volta dunha romaría, na que ela xoga coas palabras insinuantes e pícaras.
A lebre das ánimas: desenvolve o desexo envexoso dun labrego por ter a comida máis farturenta entre os seus iguais na festa da aldea. Para iso vai á caza de dúas lebres, das que unha escapa (a ofrecida ás Ánimas se tiña éxito)
A tía Lambida: a señora Castora está sempre abrumada polas peticións dos seus veciños, quen a coñecen por "sete alcumes" (cando unha veciña a chama interesadamente polo nome non merece o seu favor). Ata que, farta de tanto abuso, se mete co cura cando a chama polo alcume.

Frankenstein o el moderno Prometeo

2009-04-30T00:12:00.006+02:00

Autora: Mary W. Shelley

Ilustrador: Miguel Rodríguez Cerro

Un mozo e avanzado estudante de ciencias, entregado á investigación, descobre o modo de dar vida a un ser construído a partir de restos de cadáveres, pero o resultado repugna á súa conciencia e invádelle o arrepentimento. Con todo, non pode evitar seguir relacionado coa súa "creación", o monstro que converterá a súa existencia nunha traxedia.

Para algúns, esta é a primeira obra de ciencia-ficción; para outros, é unha das grandes novelas góticas. Están tamén os que ven nela un relato de riqueza filosófica, no que se abordan temas como a natureza do home, a fronteira entre a vida e a morte, e as posibilidades do coñecemento. Sen embargo, todos comparten que se trata dunha obra mestra, dun clásico que non se pode deixar de ler.

Anaconda y otros cuentos de la selva

2009-04-30T00:11:00.014+02:00

Autor: Horacio Quiroga

Anaconda narra a historia dun grupo de serpes que queren loitar contra uns homes, cuxo fin é quitarlles ou "roubarlles" o seu veleno para realizar vacúas inmunizadoras.

O autor válese das víboras para retratar unha das debilidades humanas: as loitas internas polo poder. As serpes únense en contra do home, pero entre elas existe gran rivalidade por razóns ata de raza. Víboras e serpes enfróntanse unhas a outras por se considerar distintas (unhas son capaces de matar co seu veleno e as outras coa súa forza) e só o obxectivo común de loitar contra o home as une; pero entre elas segue a haber enfrontamentos internos, xerarquías, discriminacións, envexas..., debilidades todas elas propias do xénero humano.

En Cuentos de la selva, Quiroga amósanos a súa solidariedade cos animais, que observan como o home invade o seu hábitat e pon en perigo a súa supervivencia.

Rebeldes

2009-04-30T00:11:00.009+02:00

Autor: Susan E. Hinton

Ponyboy Curtis é un mozo de 14 anos, orfo, nunha pequena cidade norteamericana. Xunto aos seus dous irmáns maiores e aos seus amigos forma parte dunha cuadrilla rueira, os "Greasers", mozos pobres que viven ao límite da legalidade.

Unha noite, Ponyboy discute co seu irmán maior e escapa da casa co seu mellor amigo, Johnny, un rapaz de 16 anos, triste e asustadizo, aínda marcado física e psicoloxicamente pola malleira que lle propinou un grupo de "Socs", cuadrilla rival dos "Greasers", os nenos ricos. Cando todo parecía que podía volver á súa canle, con Ponyboy decidido a regresar e enfrontar a situación co seu irmán, ambos amigos vense envolvidos nunha pelexa que cambiará totalmente as súas vidas e as dos que os rodean.

Esta novela está considerada como un clásico da literatura xuvenil contemporánea e xa foi adaptada ao cine por Francis Ford Coppola en 1982, permitindo a unha xeración de actores (Tom Cruise, Patrick Swayze, Diane Lane e Matt Dillon) facerse un oco en Hollywood. Narrada en primeira persoa polo seu protagonista, emprega un vocabulario con múltiples tacos, o que lle confire un maior grao de credibilidade á historia.

Vén á Biblioteca e goza da súa lectura (en galego ou en castelán). Seguro que pronto se converterá nun dos teus libros favoritos.

Primavera con una esquina rota

2009-04-29T21:38:00.010+02:00

Autor: Mario Benedetti

Esta obra é un testemuño directo e dorido que trata dun país escindido, fracturado pola represión e o autoritarismo, o Uruguai baixo a ditadura e o Uruguai do exilio, que constitúen un só e lacerado país. Máis aló dos acontecementos políticos, a novela céntrase na profunda conmoción que estes provocan nas relacións humanas dos individuos que os sofren.

Como no resto da súa obra, Mario Benedetti, un dos escritores máis lidos e admirados das letras hispánicas, combina aquí tenrura, denuncia, paixón, amor e Historia, para transmitir ao lector unha mensaxe de esperanza: a primavera, aínda que mutilada, revelará por fin un inverno que se anunciaba inacabable.

Otra vuelta de tuerca

2009-04-28T12:26:00.019+02:00

Autor: Henry James

Unha moza inglesa chega a unha vella mansión no campo para se encargar da educación dun neno e dunha nena que quedaron orfos. Pouco tempo logo da súa chegada, descobre que os nenos reciben periódicas "visitas" dos seus antigos preceptores, un home e unha muller que morreran había máis dun ano. A institutriz, arrepiada, decide facer o posible para defender aos nenos, cuxa custodia se lle encomendara, e trata de se interpor entre eles e as dúas pantasmas. Con esta historia tan sinxela, Henry James logrou realmente o máis difícil aínda: dar outra volta de porca a esa porca que hai escondida en todo relato de terror.

Con esta historia tan sixela, o autor logrou dar outra volta de porca ao relato de terror. Eres o suficientemente valente como para te atrever con este clásico?

El maleficio de la mariposa

2009-04-28T12:26:00.014+02:00

Autor: Federico García Lorca

El maleficio de la mariposa, escrita no 1919 e orixinalmente concibida como drama para a infancia, conta a historia duns insectos: o Poeta Curianito, despreza á adiñeirada Curianita Silvia por unha bolboreta ferida. Este amor imposible faino tolear ata a súa morte. Outros simpáticos personaxes/insectos como o Alacrán e outras cascudas interveñen engadindo comicidade e dramatismo á simple historia. Como na maioría da obra dramática de Lorca, o tema do amor e da morte, prevalecen.

Prólogo: "La comedia que vais a escuchar es humilde e inquietante, comedia rota del que quiere arañar a la luna y se araña su corazón: el amor, lo mismo que pasa con las burlas y sus fracasos por la vida del hombre, pasa en esta ocasión por una escondida pradera poblada de insectos donde hacía mucho tiempo era la vida apacible y tierna".

La familia de Pascual Duarte

2009-04-19T20:21:00.010+02:00

Autor: Camilo José Cela

Pascual Duarte cóntanos a súa vida mentres espera a execución na cela dos condenados á morte. Vítima da fatalidade, é un ser primitivo dominado pola violencia. Pero esa sinistra aparencia non é máis ca máscara que oculta a súa incapacidade para loitar contra a maldade dos demais.

Editada en 1942, esta célebre novela está considerada como fundadora do xénero coñecido como tremendismo, chamado así por reflectir con toda crueza as aflixidas situacións que viven os protagonistas. Máis aló da historia en si mesma, este libro retrata á sociedade da posguerra española no campo estremeño, describindo os seus costumes e condutas, onde a violencia é un compoñente básico na vida das persoas.

Ochir

2008-06-30T08:04:00.004+02:00

Autora: Milagros Oya
Ilustrador: Suso Cubeiro

Ochir vive na estepa de Mongolia. Soña con gañar a gran carreira que se organiza todos os anos con motivo do "Festival dos tres Xogos" na capital do seu país. Para participar na carreira vai co seu cabalo Gengis. Ao longo do camiño, Ochir atópase con diferentes persoas que cambiarán a súa vida para sempre. Esta viaxe axúdalle a descubrir o auténtico valor da amizade, da verdade e da mentira.

Poetízate: Antoloxía da poesía galega

2008-06-30T08:03:00.008+02:00

Autor: Fran Alonso

A POESÍA non morde. E, aínda que haxa quen pense o contrario, non é aburrida, romanticona nin difícil. Esta divertida antoloxía poética demostra o contrario. De Rosalía de Castro á actualidade, propoñémosche unha viaxe polos poemas máis próximos, divertidos e desenfadados da poesía galega.

Con esta obra, Fran Alonso pretende levar a poesía ás aulas, buscando sempre a complicidade e a proximidade co lector adolescente. O libro consta de arredor de 200 poemas escritos por case 80 autores e autoras galegos, ademais dun limiar e dunha "visita guiada" a modo de epílogo.

Poetízate é un libro pensado para as persoas que non están afeitas a ler poesía. Para que? Para cantar, berrar, recitar, rapear, musicar, rebelarse contra o mundo ou só para falar suave na orella. Este é un libro para sentir, gozar e intuír a poesía. Así que, xa o sabes: poetízate.

Las sillas

2008-02-11T11:40:00.001+01:00

Autor: Eugène Ionesco

Unha parella de anciáns rodéase de cadeiras esperarando a un gran número de invitados imaxinarios que, á súa vez, agardan a chegada dun orador xordomudo e clarividente que lles dará a ansiada resposta, a milagrosa fórmula: o sentido mesmo da vida.

"Nadie piensa sin embargo en las sillas. Es curioso, nadie piensa que un día (un maldito día) se le pueda romper una pata a una silla o sea pasto de la carcoma (...). Nadie piensa en las sillas, o quizás lo que pasa es que pensamos que las sillas aguantan todo lo que les echen".

(José F. de la Sota)

El misterio de la cripta embrujada

2008-02-11T11:17:00.001+01:00

Autor: Eduardo Mendoza

Esta novela do divertidísimo escritor catalán está ambientada na Barcelona dos anos 70 e trata sobre a investigación da desaparición dunha alumna do colexio das Madres Lazaristas de San Gervasio. A investigación é levada a cabo por parte dun tolo, que deixa o manicomio a cambio de realizala, vivindo unha infinidade de aventuras e desventuras.

É unha novela de suspense, de detectives, na que o autor mantén o misterio ao longo de todo o relato, sen deixar ao carón o humor, parodiando a sociedade actual (neste caso a Barcelona de hai 30 ou 40 anos), tal e como é propio del. Ademais, o seu desenlace é totalmente inesperado, polo que seguro que vos enganchará.

Nada

2008-02-11T10:34:00.001+01:00

Autora: Carmen Laforet

A protagonista é unha moza orfa chamada Andrea, que vai a Barcelona na posguerra para vivir cos seus tíos e avoa, mentres cursa os seus estudos universitarios. Chega con moitas ilusións, pero logo comprende que as cousas non son como ela pensaba. Na casa familiar atópase con que hai bastantes tensións entre os seus tíos . Por outra banda, na Universidade coñece a Ena, unha rapaza rica e liberal da que se fará íntima amiga e que desempeñará un papel importante na súa existencia, xa que con ela aprenderá o que a vida e o mundo exterior ofrecen.

Nada gustarache porque a protagonista é unha rapaza nova coma ti, con moito futuro e pouco pasado coma ti, con aspiracións a ter unha carreira universitaria (¿coma ti?).

El perfume: Historia de un asesino

2008-02-05T20:52:00.001+01:00

Autor: Patrick Süskind

Jean Baptiste Grenouille, nacido en París no século XVIII, é un individuo maldito, un monstro, quinto fillo dunha muller á que decapitaron, acusada do asasinato dos seus catro fillos maiores. Grenouille sálvase de puro milagre, pero o destino que lle agarda estará marcado polo crime, xa que o homicidio vai ser a súa vocación.

Tras pasar a súa infancia por diferentes orfanatos, desenvolve un extraordinario sentido do olfacto, sendo capaz de distinguir calquera efluvio, mesmo a través das paredes. Isto faille conseguir un traballo de axudante de perfumista, onde pode dar renda ao seu máximo soño: mesturar olores.

Tras varios anos recluído en soidade, descobre que carece de recendo persoal e a súa viaxe na procura da fragrancia perfecta faralle obsesionarse por conseguir materialmente a esencia dunha fermosa dama.

Quizais xa víchedes a película do mesmo título, baseada nesta novela. Se vos gustou, asegurámosvos que o libro vos encantará. Vide á biblioteca e levádeo en préstamo.

El bosque animado

2008-02-05T20:02:00.001+01:00

Autor: Wenceslao Fernández Flórez

Polos carreiros do bosque da Fraga de Cecebre camiñan os habitantes da aldea, algunha que outra pantasma, a Santa Compaña, sátiros e ata o ladrón Fendetestas. Das súas coitas fálasenos neste libro. Coñeceremos a triste sorte dun poste de teléfono ou os amores, só tras a morte consumados, de Geraldo e Hermelinda. Compartiremos a humilde existencia de Marica, aspirante a meiga, e a de Muocha, meiga en exercicio. Sufriremos por Pilara, que se deixa a vida nunha plataforma de tren intentando cumprir as duras tarefas que a súa ama, Juanita Arruallo, lle impón e choraremos co topo que perde á súa muller por mor do cruel gusto das damas que visten peles. Descubriremos por que o vagalume escintila na noite ou por que as troitas non pican con cebos metálicos. Todos estes personaxes, e moitos máis, constitúen o diverso panorama que imos atopando entre as árbores do bosque. As súas historias entrecrúzanse unhas con outras, resultando difícil saber cando empezan e onde terminarán.

La llamada de lo salvaje

2008-02-05T19:22:00.002+01:00

Autor: Jack London

O can Buck, que naceu e viviu nunha casa respectable, é raptado e levado cara ao Gran Norte. Progresivamente, Buck sentirá nacer nel un instinto que lle chama cara ao bosque, cara aos lobos, cara aos seus irmáns salvaxes.

Unha vez máis, London retrata nesta novela a dura vida dos habitantes de Alaska a principios do século XX, elixindo novamente como protagonista a un deses cans de fortes músculos e espesa pelame que os buscadores de ouro necesitaban para poder realizar o seu traballo.

Ti tes a oportunidade de ler esta obra en castelán e, tamén, nunha versión orixinal en inglés, adaptada a túa idade. E, por suposto, aconsellámosche que non deixes de ler Colmillo Blanco (ver entrada anterior).

Colmillo Blanco

2008-02-05T18:58:00.003+01:00

Autor: Jack London

Un can domesticado, Buck, cae nas mans dos buscadores de ouro e vese obrigado a se adaptar a unha natureza agresiva e hostil que fai aflorar os instintos máis salvaxes e primitivos do lobo adormentado que había nel. Pero no proceso de adaptación, a crueldade e a falta de sentimentos do home van cambiando ao cachorro, que agudiza a súa violencia e ferocidade para poder sobrevivir nun mundo que se rexe por leis distintas ás do mundo natural do que procede. Con todo, cando semella atoparse ao bordo da morte, o encontro cun ser humano que lle ofrece protección e agarimo lle devolve o equilibrio que perdera.

Este clásico da literatura xuvenil de aventuras é unha desas obras que poden ser lidas a calquera idade, pois a pesar de estar escrita hai máis de un século nunca deixará de emocionarnos. Na biblioteca contas con tres adaptacións distintas deste título, así que podes elixir aquela que máis te agrade.

El devorador de hombres

2008-02-05T17:48:00.002+01:00

Autor: Horacio Quiroga

Ilustrador: François Roca

Ambientado nas profundidades da xungla india, este emocionante relato de Horacio Quiroga conta a historia de Rajá, un tigre de Bengala moi orgulloso da súa estirpe que, tras contemplar como o seu pai e a súa nai son abatidos por un grupo de cazadores, é capturado e vendido a un circo de Calculta. Co obxecto de domar a Rajá, o capitán Kimberly sométeo a un trato cruel que espertará a rabia e o rancor da cativa fera. Tan só a nobreza e a bondade dun mozo admirable, lord Aberdale, poden conter as ansias de vinganza do torturado tigre de Bengala. Pero... conseguirá o valeroso aristócrata o seu propósito?

Ponte na pel deste extraordinario animal e sofre xunto a el o cativerio e as vexacións ás que o someten algúns humanos. Asegurámosche que este conmovedor relato e as súas marabillosas ilustracións non te deixarán indiferente.

Barrotes de bambú: la cárcel de las sectas

2008-01-13T18:59:00.001+01:00

Autor: Jan Terlouw

Keizer é un comisario xubilado que quere acabar coa seita Almas Vivas. Para iso convence a tres mozos para que ingresen na seita co fin de atopar actos delituosos polos que incriminar ao responsable e metelo no cárcere dunha vez por todas. Un dos infiltrados é expulsado. A outro lávanlle o cerebro e cae nas garras de Almas Vivas, e Josie está en perigo porque o Profeta da seita descobre que é a neta do comisario, con quen ten asuntos pendentes dado que tempo atrás xa lle trouxo problemas.

Como sabes, pululan hoxe no mundo enteiro as seitas esotéricas, estrañas e irracionais nas que un líder "iluminado" priva da luz da liberdade a todos os seus condiscípulos. Estes, moitos deles novos, acaban presos en cárceres terribles das que non adiviñan os seus barrotes, xa que a súa personalidade e vontade son anuladas. Deixan de pensar como homes libres, son afastados gradualmente das súas familias tras conseguir cartos delas, abandonan os estudos, ...

Esta novela policial, cuxa trama transcorre en Amsterdam e que recrea o caso dunha seita ficticia, achegarate un pouco máis ao inferno vivido por todas esas persoas.

El poder de una decisión

2008-01-13T18:28:00.001+01:00

Autor: Arturo Padilla de Juan

Para os seus antigos amigos, Sebastián é agora un ser despreciable, un traidor, e O Gato e os seus fanlle a vida imposible. Antes, Sebastián era un deles, pero iso foi ata unha noite na que ocorreu algo que todos queren ocultar. Dende entón os seus outrora compañeiros, que son cabezas rapadas, acósano para recuperar unha cousa que os incrimina.

Este libro, cunha temática de rabiosa actualidade, é a primeira novela escrita por este autor cando só contaba 18 anos e foi a gañadora do Premio Jordi Sierra i Fabra para Jóvenes Escritores 2006.

La catedral

2008-01-13T17:39:00.002+01:00

Autor: César Mallorquí

Telmo Yánez, fillo dun mestre construtor de catedrais, parte sendo aínda un rapaz dende Navarra cara a Bretaña para participar na edificación da catedral de Kerloc'h, que é financiada pola Orden del Águila de San Juan de los Siete Sellos (aquilanos). Na súa viaxe é escoltado por tres templarios (Eric, Gunnar e Loki) que queren descubrir aos autores dos roubos realizados aos cruzados en Acre. A sospeita confírmase: o malvado Simón de Valaquia está á fronte dos aquilanos.

Telmo asiste á conclusión das obras, elíxeno escultor da talla principal do altar e convértese nun home de acción para destruír, xunto con Oric, a catedral de Kerloc'h, un lugar dedicado a Lucifer. Alí quérese convocar á Besta, ao Diaño, mediante o eco dunha inmensa campá e o sacrificio dunha moza virxe, Valentina.

Esta obra está moi ben escrita, dosifica perfectamente a intriga e presenta unha narración e uns diálogos áxiles, polo que seguro que manterá vivo o teu interese do principio ao final.

El Príncipe de la Niebla

2008-01-13T16:04:00.002+01:00

Autor: Carlos Ruiz Zafón

O novo fogar dos Carver está rodeado de misterio. Nel aínda se respira o espírito de Jacob, o fillo dos antigos propietarios, que morreu afogado. As estrañas circunstancias desa morte soamente se empezan a aclarar coa aparción do Prícipe de la Niebla, un diabólico personaxe capaz de conceder calquera desexo a unha persoa a un alto prezo.

Déixate levar polo clima inquietante e ameazante que preside este relato, primeira novela xuvenil deste aclamado escritor catalán, galardoada co Premio Edebé de Literatura Xuvenil 1992.

Se decides lela e che gusta, recomendámosche tamén as outras dúas obras que integran a denominada "Trilogía de la Niebla", tituladas "El palacio de la medianoche" e "Las luces de septiembre".

Rapazas

2008-01-13T15:23:00.001+01:00

Autor: Agustín Fernández Paz

Trátase dun libro formado por seis relatos de diferente temática e extensión, pero cun fío común que lles dá unidade: todos teñen a unha rapaza como protagonista. Nun deles, "Visitante das estrelas", unha extraterrestre chega á Terra e vese mergullada en diversos conflictos. Noutro, "Dúas rosas murchas", unha rapaza mantén unha estremecedora relación cunha pantasma. A protagonista de "Unha pedra na area" vive o seu primeiro amor ifluída pola presencia dunha estraña pedra ...

Unha vez máis, Agustín Fernández Paz trata de achegar ao lector aos problemas e vivencias desa idade fronteiriza na que comeza a adolescencia. Seguro que estes relatos te cautivarán, así que vén á Biblioteca e leva en préstamo o exemplar do que dispoñemos.

Libro de las preguntas

2008-01-13T14:59:00.001+01:00

Autor: Pablo Neruda

Ilustrador: Isidro Ferrer

Pablo Neruda escribiu ao longo da súa vida un número case infinito de poemas, a modo de haiku, dedicados a cada persoa, animal, mineral e cousa que reside no universo.

As fermosas ilustracións en forma de collages creadas con diversos materiais como madeira, papel, arames, obxectos reciclados da vida cotiá e fotografías, en perfecta harmonía cos textos, deléitannos e invítannos a observar e reflexionar.

O diccionario de Carola

2008-01-13T14:02:00.001+01:00

Autora: Carmen Gómez Ojea

Ilustradora: Mabel Piérola

Nila non é feliz; é unha moza de 16 anos en plena crise familiar e persoal que soña con ser escritora.

Un día merca un dicionario de latín de segunda man. Pertencera a unha tal Carola Biga, que dez anos antes de que Nila nacera escribira o seu nome e unha data. A partir deste intre, a protagonista obsesionarase por coñecer a antiga propietaria do libro, ateigado de anotacións.

Descobre as emocións descritas nesta novela, Premio Edebé de Literatura Xuvenil, traducida ao galego por Xosé Antonio Neira Cruz , e dispoñible nesta biblioteca.

O Principiño

2008-01-13T00:03:00.001+01:00

Autor e ilustrador: Antoine Saint-Exupéry

O principiño vive nun pequeno asteroide acompañado de tres volcáns e dunha flor algo caprichosa. Esta comeza a darlle problemas que lle fan sentir unha gran soidade. Por iso decide emprender camiño na procura dun amigo. Percorre varios planetas e neles vai atopando un rei, un vaidoso, un borracho, un home de negocios, un faroleiro e un xeógrafo. A súa conclusión é sempre a mesma: que os adultos son moi estraños e que o que eles consideran cousas serias e importantes non coincide para nada co que pensa o principiño.

Proseguindo coa busca da amizade chega á Terra, pero ante a súa enorme extensión e baleiro (xa que cae no deserto) sente máis ca nunca a soidade. Atópase primeiro cunha serpe, quen lle explica o pouco que se pode agardar dos homes e lle ofrece a posibilidade de regresar á casa.

O principiño continúa o seu camiño e ten un importante encontro cun raposo, quen tampouco contribúe a mellorar a súa opinión sobre os homes, pero en cambio lle aprende o modo de facer amigos (cómpre crear vencellos e deixarse "domesticar") e, ao final do seu encontro, lle regala o seu segredo: "Soamente se ve ben co corazón. O esencial é invisible para os ollos".

Deste xeito, o principiño decátase de que a súa flor o "domesticou" e decide regresar á casa valéndose dos medios que lle ofrecera a serpe. É daquela cando coñece ao aviador que nos está a contar a historia e que descobre que atopou un grande amigo.

Este fermoso relato do autor francés é todo un clásico da literatura universal que ningunha persoa debería deixar de ler e reler. Ti tes agora a posibilidade de facelo en tres linguas diferentes: en castelán, en galego (traducida con grande acerto por Carlos Casares) e mesmo en francés. ¡Anímate, seguro que che gusta!

Anagnórise

2008-01-12T22:33:00.003+01:00

Autora: Mª Victoria Moreno

Un rapaz problemático decide marchar a Madrid, onde o agardan uns amigos relacionados co tráfico de drogas. Dende as Rías Baixas viaxa cunha muller que non lle quere dar o seu nome.Xa en Madrid, ambos despídense. O rapaz trata de reencontrarse coa súa compañeira de viaxe e só entón coñecerá o seu nome e a razón que tiña para ocultalo.

Na Literatura, o termo anagnórise fai referencia ao momento no que ao protagonista se lle revela algunha verdade sobre si mesmo, o que provoca un cambio transcendental na dirección da trama.

Sube ao coche cos protagonistas desta novela e convéncente de que fuxir dos problemas non fai que estes desaparezan. Non tes escusa, xa que na Biblioteca contamos cun total de 45 exemplares en dúas edicións distintas.

Outras obras da autora que tamén están a túa disposición son "Guedellas de seda e liño" e "Leonardo e os fontaneiros".

El niño que vivía en las estrellas

2008-01-12T19:47:00.001+01:00

Autor: Jordi Sierra i Fabra

Ilustradora: Carme Solé Vendrell

Un estraño neno que di proceder do espazo chega á consulta psiquiátrica do doctor Rojas tras ser atopado vagando só polas rúas, desnutrido e asustado. O neno non pode resistir a luz, dispara imaxinariamente cando se sente ameazado e fala dunha remota galaxia.

O médico acabará descubrindo a verdade: o seu pai tíñao conectado a un casco de realidade virtual e pechado na súa habitación para que non estorbase. Ao morrer o pai e esgotarse as pilas, o neno sae da súa casa por primeira vez.

Este libro, incluído no noso catálogo, é un alegato en contra do uso abusivo e sen control das novas tecnoloxías, algo que, por desgraza, cada vez está máis de actualidade. Ademais do problema da ludopatía infantil, recolle situacións de pobreza mental, humana e intelectual, resultando idóneo para tratar os temas transversais de educación para a saúde e a solidariedade. Deberías lelo, pois seguro que non che deixará indiferente.

Cartas de inverno

2008-01-12T18:47:00.001+01:00

Autor: Agustín Fernández Paz

Ilustrador: Rafael Chacón

Tareixa Louzao recibe un voluminoso sobre remitido polo seu irmán Xabier dende un lugar descoñecido para ela: Doroña (Vilamaior). No interior inclúense unha carta e outro sobre máis pequeno coa lapela de cerre reforzada por unha fita adhesiva. Na carta, Xabier indícalle á súa irmá que non abra o sobre fechado e que, se antes dunha semana non volve recibir outra misiva súa, llo entregue ao Inspector Soutullo da Comisaría de Vigo.

Pero Tareixa non pode resistir a tentación e abre o sobre. Dentro aparecen unhas cartas que lle foran remitidas a Xabier polo seu amigo, o famoso pintor Adrián Louzao, e que el tardara tempo en recibir por mor dunha longa estadía en Quebec.

Nelas, Adrián cóntalle a súa nova vida nunha vella casa que adquiriu nun pobo galego. Pero do entusiasmo inicial vai pasando á preocupación e ao medo, debido á sucesión de estraños sucesos, polo que pide axuda ao seu amigo.

Seguramente, xa teñas lido algún libro de Agustín Fernández Paz, un dos autores galegos actuais máis prolíficos no que á Literatura Infantil e Xuvenil respecta. Se non é así, invitámoste a que visites a nosa biblio, onde poderás escoller entre varias das súas obras. Se che gustan as novelas de medo e misterio esta sería unha boa opción.

Amar e outros verbos

2008-01-12T17:38:00.001+01:00

Autor: Ana María Fernández

Ilustrador: Xosé Cobas

Este libro, recoñecido co Premio Lazarillo 2001, é un conxunto de vinte e cinco poemas en verso libre que teñen en común o uso dun verbo como elemento creador, o cal, ademais, serve de título aos mesmos.En clave coloquialmente metafórica, estes poemas fálannos de situacións cotiás tales como bailar, comer, enfadarse, envellecer, estrear, medrar, rir, chorar, ..., aínda que, en realidade, tratan os grandes temas da poesía (vivir, amar, morrer, ...). Son, pois, poemas con desgustos e alegrías como a propia vida que, acompañados por unha serie de fermosas e suxestivas acuarelas, nos invitan a Vivir e Soñar.

Se che apetece descubrir os sentimentos que se agachan tras de cada un deses 25 verbos, podes ler este libro na nosa Biblioteca.

Cando petan na porta pola noite

2007-12-08T09:16:00.001+01:00

Autor: Xabier P. Docampo

Ilustrador: Xosé Cobas Gómez

Este libro, Premio Nacional de Literatura Infantil e Xuvenil 1995, inclúe catro contos de maxia e fantasía titulados O espello do viaxeiro, O fornadas, A loba e O cumpremortes (ver aquí o argumento de cada unha destas historias). Nestes relatos de tema galego destacan a sorpresa, o misterio, o terror, aparecen meigas, trasnos e a vida dos protagonistas pode estar determinada pola fatalidade ou polo destino. Xabier P. Docampo actualiza as grandes correntes do relato fantástico: a tradición oral galega e a literatura de misterio e imaxinación do século XIX.

O Nicolasiño

2007-12-08T08:44:00.001+01:00

Autor: René Goscinny

Ilustrador: Sempé

A vida no colexio supón unha etapa importante e accidentada na historia de calquera persoa e para o pequeno Nicolás non é distinto. Alí, vai coñecer novos compañeiros cos que pasalo bomba, aínda que de contado van xurdir problemas coas notas.

Non podes deixar de ler este clásico da literatura infantil con textos de René Goscinny, o creador de Asterix e Lucky Luke, e debuxos de Sempé. A través das aventuras deste neno, o autor ofrécenos a súa visión, sempre irónica, da vida, da familia, da escola e da sociedade en xeral. Ademais, se che gusta e te atreves, temos a versión orixinal en francés.

A expedición do Pacífico

2007-12-04T13:33:00.001+01:00

Autora: Marilar Aleixandre

Relatada en primeira persoa, a novela conta, en dez capítulos, a historia dunha expedición polo Pacífico. Entre os oito científicos que a compoñen, atópase a protagonista, Emilia, unha rapaza que, para poder participar na viaxe, se ten que disfrazar de neno. O relato, que abrangue dende 1867 -cando saen de España- ata 1871 -ano da chegada da expedición a Lisboa-, describe as aventuras dos viaxeiros dun xeito realista e verosímil. Abundan as referencias á historia e aos coñecementos relacionados coas ciencias da natureza e coa navegación. Paralelamente, asistimos a unha aventura interior: o cambio que se produce na protagonista, que inicia a viaxe con algo máis de doce anos e chega feita unha muller.

No "Epílogo" faise referencia á verdadeira expedición ao Pacífico na que se inspira a novela, que tivo lugar entre os anos 1862 e 1866.

Garra de la guerra

2007-12-04T12:53:00.001+01:00

Autora: Gloria Fuertes
Ilustrador: Sean Mackaoui

Este libro contén todos os poemas que Gloria Fuertes escribiu contra a guerra. Falan da guerra civil, da bomba atómica, do horror e da fame; e, por suposto, dos nenos e das nenas, que son sempre as verdadeiras vítimas de todas as guerras.

Os collages de Sean Mackaoui posúen o impacto visual dun cartel e, xunto coas palabras desta maga da poesía, debuxan o máis clamoroso grito de antiguerra.

O vixía no centeo

2007-12-04T11:42:00.001+01:00

Autor: J. D. Salinger

Holden Caulfield é expulsado do instituto polas súas malas notas e vagará só pola cidade de Nova York. Este adolescente narra dun xeito directo e rotundo as súas peripecias nunha viaxe sorprendente. As súas andanzas pola gran mazá, con relacións moi curiosas e con atrevementos de todas clases, permiten ao protagonista achegarse á vida adulta.

Holden Caulfield representou durante moitos anos o modelo de adolescente rebelde e resentido. Este clásico da literatura norteamericana do século XX, (publicado por primeira vez en 1951), amosa a visión que da realidade ten unha persoa que perde a confianza e o agrado das persoas que lle rodean e de toda a sociedade en xeral. Trátase dunha obra cun forte contido de crítica social, aínda vixente hoxe en día, e que agora a Biblioteca do teu centro che ofrece tanto en galego como en castelán.

¡Asústate, Merche!

2007-12-04T11:23:00.001+01:00

Autora: Fina Casalderrey

Velaquí a historia de Auria, unha rapaza de quince anos que está a vivir os problemas da adolescencia. Como non ten irmáns, todo canto lle acontece compárteo cunha amiga imaxinaria, Merche, á que se dirixe no seu diario.

Filla de nai solteira, Auria é previda na casa arreo sobre os riscos vencellados á relación cos rapaces. É por iso polo que Auria se nega a medrar e sente medo ante a posibilidade de namorarse, experiencia que identifica cos sufrimentos padecidos pola súa nai. Esta situación empeza a cambiar cando a nai inicia unha relación amorosa co cura da parroquia. Isto coincide co comezo da amizade entre Auria e Paio, un rapaz ao que coñece durante unha viaxe de peregrinación por Europa. Con Paio, Auria descobre o amor por primeira vez e, aínda que non está segura de que este vaia durar toda a vida, loita con tódalas forzas porque así sexa.

Cuentos para jugar

2007-12-03T19:02:00.001+01:00

Autor: Gianni Rodari
Ilustrador: Gianni Peg

O libro está composto por vinte pequenos relatos nos que o máis importante é o xogo que se realiza cos finais de cada un deles. Unha vez formuladas as historias -que poden falar de novos frautistas que se levan os coches en vez das ratas, de cans que non saben ladrar ou de extraterrestres que collen taxis para marchar ao seu planeta- o/a lector/a ten que elixir o final que considere máis axeitado de entre tres posibles.

As cidades e os pobos italianos son o marco das diversas historias, nunha época actual, chea de xente e de nenos/as de hoxe en día, pero cuns personaxes que tanto se poden referir ao pasado como ao futuro.

Cuando Hitler robó el conejo rosa

2007-12-03T17:24:00.002+01:00

Autora e ilustradora: Judith Kerr

Unha familia de orixe xudea fuxe da Alemaña nazi temendo pola súa vida. Atrás deixarán moitas cousas, especialmente Anna, a nena da familia, que se verá obrigada polas circunstancias a madurar de súpeto, incorporándose ao complexo mundo de preocupacións e responsabilidades dos adultos. Para a protagonista deste relato autobiográfico, aquel coelliño de peluche rosa co que xogaba e que quedou abandonado na súa casa de Berlín, simbolizará a infancia bruscamente perdida.

Aínda que a persecución de Hitler aos xudeos aconteceu hai xa moitos anos, as obras literarias baseadas neste feito histórico continúan emocionándonos hoxe en día.Lendo esta historia comprenderás o difícil que resulta esquecer o teu país cando tes que fuxir del, vagando dun lugar a outro e esperando que te acollan e che dean un traballo, padecendo miseria e soidade, temas que, por desgraza, continúan a estar de actualidade. Pero, tamén é un relato de esperanza, amor á familia e perdón.

Matilda

2007-11-18T17:36:00.001+01:00

Autor: Roald Dahl
Ilustrador: Quentin Blake

Matilda é xenial. Sen cumprir os 5 anos xa leu moito e ten asombrosos coñecementos. Os seus mediocres pais, sen embargo, considérana unha inútil. Por iso decide desquitarse. E cando comeza a ir á escola, enfróntase á terrible señora Trunchbull. Daquela, fai algo marabilloso. ¿Vaste perder isto?

Goza desta estupenda obra do extraordinario Roald Dahl e descubre o resto de títulos deste autor que podes atopar na nosa biblio.

Manolito Catrollos

2007-11-18T17:08:00.001+01:00

Autora: E l vira Lindo
Ilustrador: Emilio Urberuaga

Os maiores líanse coas cousas e ¡lían aos pequenos! Menos mal que está Manolito. Con el, todo queda perfectamente claro. E, ademais, cóntanos as cousas de cada día como se fosen aventuras estupendas. Segue as súas historias e as dos seus amigos (Orellóns, López, Susana, o Imbécil...) e pásao bomba.

Manolito ten moitas aventuras que contarte e nós podemos ofrecerchas tanto en galego como en castelán.

¿Que é o escaparate?

2007-11-17T23:44:00.001+01:00

Este blogue pretende servir aos/ás seus/súas visitantes como guía de lectura, non só de obras de ficción, senón de todo tipo de títulos, en xeral. Atoparedes reseñas sobre cada un deles e ligazóns que vos falen dos libros e dos seus autores. Podedes expresar as vosas opinións, tanto se xa os tedes lido coma se non é así.

Neste caso, as etiquetas que acompañen a cada entrada farán referencia ás materias, temas ou personaxes relacionados con cada obra, o que permitirá a súa clasificación.

No caso de que algún libro che pareza realmente interesante e aínda non o teñamos no noso catálogo, podes suxerir a súa compra a través deste blogue ou cubrindo unha desiderata, que deberás entregar a algún/algunha dos/as profesores/as do Equipo da Biblioteca. Se o prefires, podes comunicarte connosco tamén mediante un e-mail, premendo o enlace de contacto que figura na columna lateral da dereita.